Sterk auke i tilskodartalet på verdas einaste nynorske barne- og ungdomsbokfestival.
Festivalforfattar Maria Parr opna Falturiltu saman med Fargespill for ei veke sidan. No har nær 6000 deltatt på festivalen.
Kring 5700 store og små deltok på dei mange arrangementa på Falturiltu den siste veka. Det er rekord med god margin og over 40 prosent auke frå året før.
Det betyr at Falturiltu framleis er Noregs største barnebokfestival. Falturiltu har òg passert Dei nynorske festspela i publikum i år, og er dermed den største festivalen som feirar nynorsk kultur.
– Det er heilt enormt bra. No ser me fram til tiårsjubileum i 2016! seier festivalsjef Roald Kaldestad.
Terningkast seks
Nesten alle dei opne arrangementa har vore utselde.
– Det er vanskeleg å trekke fram høgdepunkt frå Falturiltu 2015, for dei magiske opplevingane har stått i kø, men opninga med Fargespill og Maria Parr må nemnast. Ungane frå heile verda lekamleggjorde årets motto, fart og sjølvtillit, fortel Roald Kaldestad.
Maria Parr og Fargespill opna Noregs største barnebokfestival; Falturiltu.
Sitatet er teke frå boka Tonje Glimmerdal av festivalforfattar Maria Parr, og Parr sine tekstar gjekk som ein raud tråd gjennom festivalen. Ho også var sjølv til stades nesten heile veka.
Konserten med Odd Nordstoga fekk terningkast seks i Haugesunds Avis, og tidlegare på dagen hadde Nordstoga trollbunde små og store om bord på bokbåten Epos ved Leirvik kai.
Arrangementa som trekte mest folk var i år musikalen Tonje Glimmerdal, laga av studentar ved Høgskulen Stord/Haugesund, konsertane med Fargespill, Odd Nordstoga og Sigvart Dagsland/Maria Parr.Elles var det ei lang rekke skule- og barnehagebesøk, kino, temadagar, utstillingar og faglege seminar.
Skapte barnebøker på festivalen
– Falturiltu er også svært stolte over årets mange nyskapingar. Blant anna koblarseminaret på Galleri Giga, der forfattarane Agnes Ravatn og Eli Fossdal Vaage og illustratørane Ingunn Dybendal og Stine Belden Røed møttest for første gong for å laga biletbøker.
Seminaret var leia av redaktør i Magikon forlag Svein Størksen og forfattar Per Olav Kaldestad.
– Dette kjem til å bli ein tradisjon, seier Roald Kaldestad.
Forfattarane og illustratørane er allereie godt i gang med kvar sine bøker etter berre nokre få dagar saman på festival.
Agnes Ravatn og illustratør Ingunn Dybendal kom godt i gang med ei barnebok om kva som skjer når ei heil gate skal på julebord. Dei møttest for første gong på koplarseminaret til Magikon forlag på Falturiltu.
Elevar bokbada forfattarar
Svært vellukka var også konseptet 3 forfattarar og 1 band, inspirert av ein opplegg på Litteraturfestivalen på Lillehammer i år, der ungdomsbokforfattarane Tor Arve Røssland, Rune Belsvik og Bente Bratlund blei bokbada av elevar på tre ungdomsskular, held Kaldestad fram.
Forfattaren Hans Sande bidrog med både føredrag, bokopplesingar og utstilling av fuglekassar og altertavler på Falturiltu.
Det var også musikalsk-litterær turne med Ingunn Røyset og Trio vest, i dei tre kommunane Fitjar, Kvinnherad og Stord, og for første gong samarbeidde Falturiltu med Barnas Turlag, om det nydeleg arrangementet Eventyr og tur(iltu), der rundt hundre små og store gjekk rebusløype med lommelykt før Maria Parr las eventyr inne på Sunnhordland museum.
Hege Myklebust, Roald Kaldestad og Jane Jünger leier Falturiltu.
Forfattarane og illustratørane som deltok i år var:
Maria Parr, Rune Belsvik, Atle Hansen, Anders Totland, Ingvild Sjo, Berit Rødstøl, Sissel Horndal, Martine Grande, Anna R. Folkestad, Roald Kaldestad, Vegard Markhus, Ragnar Hovland, Tor Arve Røssland, Bente Bratlund, Agnes Ravatn, Eli Fossdal Vaage, Stine Belden Røed, Ingunn Dybendal, Ingunn Røyset, Synnøve Macody Lund, Hans Sande og Odd Nordstoga.
x
